曼城捧盃high得滯 比帥要教紅魔？

嚟到英超教曼城嘅第一季，比歷連尼就立即捧咗英聯盃；唔計圖圖盃呢啲細盃，呢個仲係比帥登陸歐洲以嚟嘅最重要冠軍，相信佢都開心到飛起。可能係興奮到胡言亂語，比帥賽後嘅訪問真係震驚球壇，佢竟然話要教同市宿敵曼聯！莫耶斯，問你驚未？

[img]http://static.apple.nextmedia.com/images/apple-photos/apple/20140304/large/04s5-444p.jpg[/img]
■比歷連尼捧盃太興奮，居然講錯自己教緊曼聯。路透社

[img]http://static.apple.nextmedia.com/images/apple-photos/apple/20140304/large/04s5-403p.jpg[/img]
■拿斯尼拎住今場最佳球員嘅獎座，扮鬼扮馬影相。互聯網

[b]比帥烏龍笑料一大籮[/b]
曼城周日喺溫布萊以3:1擊敗新特蘭，捧走英聯盃，賽後記者即刻搵到比歷連尼嚟做訪問，問吓佢教曼城大唔大壓力咁，非常簡單，相信球會公關都一早教晒路。不過，比歷連尼突然紅魔鬼上身咁，竟然咁講：「我好開心，好開心，我好鍾意面對壓力，所以我先要教一間好似曼聯咁偉大嘅球會。」同好多球迷一樣，我求大俠當然聽到O晒嘴；如果曼聯領隊莫耶斯聽到，相信佢應該嚇到鼻哥窿都冇肉。
聽番上文下理，加埋比歷連尼今季成日擺烏龍，相信呢次都係一時口快，英文又唔多好，先將曼城講咗做曼聯啫，所以莫耶斯唔使咁驚，曼聯球迷亦唔需要開心。做領隊做到比帥咁多烏龍笑料，其實都幾少見；嚟咗英國半季多啲，先有歐聯計錯得失球搞到部署出錯，而放棄爭取首名出線，之後傳過佢記錯球員「冧巴」換錯人，呢次將曼城講咗做曼聯都算係小事喇。

[img]http://static.apple.nextmedia.com/images/apple-photos/apple/20140304/large/04s5-402p.jpg[/img]
■前Oasis成員Noel Gallagher（左）出席曼城嘅慶功大會，仲同射手阿古路合照。互聯網

[b]忘形高柏尼玩爛隻盃[/b]
除咗比帥外，隊長高柏尼就喺頒獎台興奮得滯，玩到連個獎盃都爛埋。當佢高舉英聯盃時，成個盃嘅底座甩咗出嚟。鏡頭捕捉到呢一幕，見到最搞笑嘅係企喺隔離嘅拿斯尼，原本嘻哈大笑，即刻變臉，嚇到面都青。不過，呢啲烏龍嘢冇影響到全隊心情，入到更衣室後，個個爭住同個盃合照，然後即刻放上網同朋友分享。
曼城今季4線作戰，如今先奪英聯盃，士氣大振，嚟緊佢哋仲有3條戰線。除咗歐聯16強首回合落後緊巴塞隆拿兩球，奪標機會較低外，佢哋都有機會染指埋英超同英足盃。英國博彩公司亦開出盤口，曼城成為英格蘭本土3冠王嘅賠率為4.3倍。

[img]http://static.apple.nextmedia.com/images/apple-photos/apple/20140304/large/04s5-401p.jpg[/img]
■喺更衣室入面，曼城球員同獎盃合照，然後放上網。互聯網

來源:蘋果日報網站